Isang napakaganda at masayang bakasyon po sa buwan ng Mayo ang bati ko sa lahat ng mga Mothers. Para sa inyo po ang dakilang araw na ito. Mahal na mahal po namin kayo.
NANAY
Siyam na buwan mo akong dinala sa iyong sinapupunan
Siyam na buwan mong inasam-asam na masilayan kung kamukha mo nga ba ako o kahawig ng tatay ko
Wala pa man ako sa mundong ito
Ay pinaplano mo na kung paano mo ako aalagaan at bibigyan ng magandang kinabukasan
Nanay na nagluwal. Napupuyat sa pagtimpla ng gatas. Oras-oras, minu-minuto ay dinadama ang likuran ko kung basa ng pawis dahil takot kang magkasakit ako.
Kahit makulit at malikot ako ay ibinibigay mo lahat ng gusto ko dahil ayaw mong maging malungkot ako.
Ang ibig mo'y lagi ako sa tabi mo, ikaw ang aking unang kalaro at tagapagtanggol anumang oras
Ikaw ang una kong guro, nais mo'y maging matalino ako
Di man ako kasing talino ng iba ay proud ka pa rin dahil bibo naman ako
Pinalaki mo akong may takot sa Diyos at marunong makipagkapuwa
Kahit natutunan kong magsinungaling at maglihim sa iyo
ay inuunawa mo pa rin ako dahil ikaw ang unang taong nakakakilala ng pagkatao ko
Kapag nasa malayo ako ay inaalala mo ako, dugo at pawis ang tinustos mo makatapos lang ako sa pag-aaral dahil gusto mo'y 'wag akong matulad sa hirap na dinanas mo
Halos maluha ka sa galak ng makatapos ako at nagkaroon ng trabaho
Lagi mong pinapa-alala sa akin na mag-ipon ako para sa kinabukasan ko
Bakas ko sa mukha mo ang kasabikan sa tuwing uuwi ako sa piling mo at iyong uusisain ang aking kalusugan sa halip na ipakita mo sa akin ang iyong karamdaman
Mas minamabuti mo pa ring ligtas ang buhay ko kaysa sa sarili mo
Sa aking pag-aasawa ay maiiwan kang muli, mangungulila, maghihintay sa pagdalaw ko
Kahit nag-iba na ang buhay ko ngayon ay nandiyan ka pa rin palagi
Hindi mo nalilimutan kung ano ang paborito kong pagkain, batid mo ang kilos ko kung may suliranin ako, lagi kang nakahanda sa pagtulong sa akin
Nakakalimot man ako sa iyo ngunit kahit saglit ay di mo ako nalilimutan
Sana araw-araw ay Mother's Day dahil araw-araw ay mahal nyo kami
Sana hindi lang isang araw para ipakita sa inyo kung gaano namin kayo kamahal
Happy Mother's Day Nanay...
See Ya!!
